दिनांक २४ ऑगस्ट २०१६.

पुणे.

 

नमस्कार.

 

मी आणि तुमचा सगळ्यांचा आवडता कलाकार सुनील बर्वे स्वित्झर्लंडला येतोय – एक अनोखी मैफिल घेऊन - "मैफिल शब्द सुरांची".

या मैफिलीला मी ‘अनोखी’ या करता म्हणतो आहे, कारण एरवी मैफिलीत गाणारे गातात आणि श्रोते ऐकतात. या मैफिलीमधे श्रोते देखिल गाणार आहेत, बोलणार आहेत, गप्पा मारणार आहेत! तुमच्या सक्रीय सहभागानेच या मैफिलीत रंग चढत जाणार आहे.

 

माझं आणि सुनीलचं करियर साधारण एकत्रच चालू झालं. आम्ही अनेक प्रोजेक्ट्स मधे एकत्र होतो. साधारण बत्तीस वर्ष आम्ही दोघे एंटरटेनमेंट इंडस्ट्रीमधे विविध भूमिका निभावतोय. गायक, नट, निर्माता, दिग्दर्शक म्हणून दोघेही वावरतोय. बत्तीस वर्षात आमच्या अनुभवांची पोटली चांगली जाड जूड झाली आहे. ही पोटली आम्ही तुमच्या समोर उघडणार आहोत.

 

या पोटली मधे कविता आहेत, गाणी आहेत, कहाण्या आहेत, किस्से आहेत... काही इतरांचे, तर काही आमचे स्वतःचे.

 

सुनीलचा नट ते ‘हर्बेरियम’चा निर्माता हा प्रवास विलक्षण आहे. प्रेरणादायी देखिल आहे. त्यातल्या काही टप्प्यांवर तो तुम्हाला निश्चित घेऊन जाईल. तो छान कविताही वाचतो, आणि सुरात गातोही! आपण नशीबवान असलो, तर तो त्याच्या चिरतारूण्याचं इंगित देखिल सांगेल!

 

माझ्या प्रत्येक गाण्यामागची गोष्ट रंजक आहे. त्यातल्या काही मला तुमच्या बरोबर शेअर करायला निश्चित आवडतील. पंडित भीमसेन जोशी, पु.ल.देशपांडे, आशा भोसले, या मी जवळून पाहिलेल्या माझ्या दैवतांविषयी नुसतंच बोलणार नाही, तर त्याचं अत्यंत दुर्मिळ ध्वनीमुद्रण देखिल ऐकवेन.

 

गाण्याचा जन्म कसा होतो, हे तुम्हाला प्रत्यक्षात अनुभवायला मिळेल. आपण सगळे मिळून एका कवितेला चाल लावून बघुया. मला आवडेल तुमच्या बरोबर गाणं बनवायला. हा वेगळाच अनुभव तुम्हाला देखिल आवडेल याची खात्री आहे.

 

या मैफिलीची सांगता आपण सगळे मिळुन ‘तू बुद्धी दे, तू तेज दे’ या डॉ. प्रकाश बाबा आमटे या चित्रपटातल्या गाण्याने करूया. तुम्ही गायक असाल किंवा नसाल - सगळे प्रॅक्टिस करून या बरंका.

याचा काराओके ट्रॅक देखिल माझ्या वेबसाइटवर आहे. जरूर डाऊनलोड करून रियाज करा.

 

मूळ गाणं:

Hhttps://www.youtube.com/watch?v=5VVZp4r1VT4 

 

काराओके ट्रॅक:

http://rahulranade.com/Inner/Marathi_Films.html

 

भेटू १० सप्टेंबरला.

गणपतीबाप्पा मोरया!

 

राहुल रानडे.